Ի՞նչ է բլոկչեյնը

Բլոկչեյնը տվյալների պահպանման թվային տեխնոլոգիա է։ Այն՝ ինչպես և բխում է անունից, բլոկերի շղթա է, որտեղ յուրաքանչյուր բլոկ պարունակում է որոշակի տեղեկատվություն և գաղտնագրված հղում դեպի նախորդ բլոկը: Կարևոր է նաև նշել, որ բլոկչեյնը, թե՛ իր հատկություններով, թե՛ իր կառուցածքով տարբերվում է մեզ ծանոթ տվյալների բազաներից նրանով, որ չի պահվում հստակ մի վայրում, այլ տեղաբաշխված է ողջ աշխարհով հազարավոր համակարգիչների շրջանում։Բլոկչեյնի մյուս նշանակալի առանձնահատկությունը վերջինիս ապակենտրոնացված և բաց լինելն է։ Բլոկչեյնը տեղեկատվություն է պարունակում բոլոր գրանցված գործարքների վերաբերյալ և չի պահանջում որևէ միջնորդ մարմին։ Եվ քանի որ բլոկչեյնը բացառում է իրենց շահը հետապնդող ֆիզիկական միջնորդներին, (մարդկանց կամ ընկերությունների), դա անհնար է դարձնում բլոկչեյն ներմուծված որևէ տեղեկության խմբագրումը, կեղծումը կամ հեռացումը ապագայում։

Ի՞նչ գերխնդիր է լուծում բլոկչեյնը։

Բլոկչեյնը ցանկացած ինֆորմացիա ապահով պահելու համար նախատեսված մեխանիզմ է, սակայն հարց է ծագում, թե ինչ խնդիրներ է այն լուծում։ Առաջին հերթին նշենք, որ բլոկչեյնի հիմնական սկզբունքներն են՝ մասնակիցների գաղտնիությունը, կեղծարարությունից պաշտպանությունը և, ամենակարևորը, վերահսկող մարմիններից անկախությունը: Այն թույլ է տալիս առանց որևէ միջնորդի երկու կամ երկուսից ավել մարդկանց միջև ստեղծել վստահություն, և նույնիսկ է ընձեռում է հնարավորություն և բավարար հիմքեր, որպեսզի հարկ եղած դեպքում որևէ մարդու պատասխանատվության ենթարկել։ Ինչպես արդեն իսկ նշեցինք մյուս կարևոր խնդիրը գաղտնիությունն է։ Այն թույլ է տալիս կատարել անանուն գործարքներ, ինչը հնարավորություն է տալիս օգտատերերին կատարել գաղտնի դրամական փոխանցումներ։

Բլոկչեյնի կարևորությունը

Արդեն վաղուց է, ինչ բլոկչեյն տեխնոլոգիայի նկատմամբ մեծ հետաքրքրություն է նկատվում աշխարհի մի շարք երկրներում, և թերագնահաատել վերջինիս դրական ազդեցությունը տնտեսության տարբեր ոլորտների վրա ուղղակիորեն անհնար է։ Բլոկչեյնի ազդեցությունը կարելի է նույնիսկ համեմատել ինտերնետի ազդեցության հետ, քանի որ վերջինս կարող է խթան հանդիսանալ տնտեսության զարգացման համար։ Չնայած այն հանգամանքին, որ բլոկչեյնը լայն տարածում է ստացել ընդամենը նախորդ տարվա սկզբից, այն արդեն իսկ հասցրել է գտնել իր կիրառությունը բազմաթիվ բնագավառներում։Բլոկչեյն տեխնոլոգիան կիրառելի է բոլոր այն ոլորտներում, որտեղ կատարվում են տարատեսակ գործարքներ կամ գրանցումներ (oրինակ՝ բանկային համակարգում): Եվ քանի որ համակարգ ներմուծված տվյալները կամ գործողությունները անհնար է հեռացնել կամ խմբագրել, բլոկչեյնը բացառում է ապօրինի գործարքների իրականացում և կոռուպցիան։